العمل تحت ضغط

هل للعمل تحت ضغط إيجابيات أو مميزات؟؟

ناس كتير بتخاف اول ما تسمع ان الوظيفة اللي مقدم عليها محتاجة شخص عنده القدرة إنه يشتغل تحت ضغط

لكن خبراء التوظيف بيأكدو إن العمل تحت ضغط له مميزات كتير زي:

1- اكتساب الصبر وعدم الشعور بالتعب بسرعة
2- الشعور بالإنجاز والرضا بعد إنهاء العمل
3- إظهار الطاقة الإبداعية عند بعض الموظفين
4- زيادة تركيز الإنسان وقدرته على التخطيط
5- الوصول لأعلى مستويات الأداء لدى الموظف

لكن زي مشفنا إيجابيات العمل تحت ضغط لازم نعرف كمان سلبيات العمل تحت ضغط وتأثيرها على الإنسان

على الرغم من مميزات العمل تحت ضغط للإنسان وللمكان اللي بيشتغل فيه ,لكن بيكون ليه آثار سلبية على المدى الطويل زي

1- الإصابة بأمراض كتير زي السكر والضغط
2- التأثير على الحياة العائلية للشخص
3- كثرة الأخطاء اللي ممكن يقع فيها الشخص بسبب العمل تحت ضغط لمدة طويلة
4- اضطرابات النوم والمزاجية
5- القلق والتوتر طول الوقت
6- التأثير على الذاكرة وزيادة النسيان
7- قلة تركيز الإنسان

فالحل الأمثل من وجهة نظر الخبراء هو التوازن

عشان تقدر تستفيد من الإيجابيات وتقلل من آثاره السلبية

وبعد متكلمنا عن أنواع الضغوط اللي ممكن يتعرض ليها الإنسان في عمله

هنتكلم دلوقتي عن بعض الاستراتيجيات اللي ممكن تساعد الإنسان في العمل تحت ضغط

1- خليك هادي
طبيعي إن الإنسان أول ما يحس بوجود ضغوط عليه إنه يظهر جواه مشاعر سلبية كتير
زي التوتر والقلق
عشان كده ركز إنك تكون هادي
وواثق من جواك إنك تقدر تعمل الشغل في المعاد المطلوب

2- جهز الخطة
مهما كان الضغط اللي إنت بتشتغل تحته
فوجود خطة واضحة لإنجاز الشغل أو المهمة هيخليك تمسك بزمام الأمور
كمان هيساعدك تتخلص من التوتر والقلق اللي اتكلمنا عنهم النقطة اللي فاتت

3- المهم اولا
خصص نص ساعة كل يوم عشان تحدد أولوياتك في اليوم ده
وإيه المهام اللي محتاجة تخلص اليوم ده بشكل عاجل
وابدأ بيها يومك

4- خد بريك
الشغل لساعات طويلة تحت ضغط
هيأثر على مخك وجودة عملك
عشان كده الأفضل إنك تاخد بريك أثناء الشغل عشان تدي عقلك فرصة للراحة
وإنه يقدر يشتغل بشكل أحسن
بس خلي بالك
إوعي تفكر في الشغل أثناء البريك
حاول إنك تشغل نفسك بأي حاجة تفصل عقلك عن التفكير عشان يقدر يشتغل بكفاءته كاملة

5- ابعد عن المشتتات
امنع مواقع التواصل الاجتماعي زي الفيس بوك او تويتر خلال وقت الشغل
متخليش مخك يخرج عن تركيزه
ممكن تخصص وقت ليها في البريك
لكن بلاش تفتحها خلال الوقت اللي إنت مخصصه للشغل في خطتك

6- فكّر نفسك دايما بهدفك
في لحظات هتحس بالتعب أو الإحباط
افتكر دايما هدفك أو السبب اللي مخليك تشتغل في المكان ده
وده هيساعدك تتجاوز لحظات التعب ويخليك تكمل من جديد

في النهاية إحنا في وظيفة يهمنا صحتك النفسية والجسدية وبننصحك لا تتنازل عن سلامتهم تحت أي سبب لأن الصحة لا تعوض مطلقاً مهما وصلت لمكانة كويسة أو قدرت تحقق إلي كنت مخططلة في النهاية إحنا بنشتغل وبنتعب في المقام الأول عشان نحقق دخل يوفر معيشة كريمة ولتحقيق أهدافك ,وعليه إنت مش مخلوق عشان تشتغل طول الوقت تحت ضغط نفسي بداعي الخوف من المستقبل ,لكن في أسباب أهم إنت تستدعي الإهتمام أكثر زي دينك وأسرتك

ودا يوصلنا إن العمل وسيلة وليست غاية ,إستمتع بوقتك وأيامك لأن اليوم إلي بيعدي هي صفحة وإتقطعت من عمرك فبقدر إمكانك خلي كل صفحة عدت كان فيها إنجاز في دينك أو بوجودك بين أسرتك أو بتحدي جديد في شغلك بدون ضغط نفسي يرهقك ويأثر علي صحتك.