interview تعمل إيه عشان تعدي مقابلة العمل الإنترفيو دوام كامل

تعمل إيه عشان تجتاز مقابلة العمل أو الإنترفيو إن شاء الله

لا يخفي علي أحد إن الإنترفيو هي بوابة دخولك للعمل بعد توفيق الله تعالي

لذلك بعد أن قمت بكتابة سيرة ذاتية جيدة وقد وفقت في لفت نظر الشركة لطلبك للمقابلة الشخصية ,هناك عدة نقاط يجب أن تركز عليها حتي تحصل علي الوظيفة بإذن الله تعالي.

1 – اتكلم معاك عن تحدي قامت الشركة بمواجهته.
لو الانترفيور شرحلك تحدي كان بيواجه الشركة وازاي بخبراتك تقدر تساعد الشركة وتحل المشكلة فا دي نقطة عظيمة جداً لأن لو قدرت ترسم حل للمشكلة وانت بتتناقش معاه ووضحت الخطوات الي تقدر تمشي عليها وازاي تقدر تستخدم خبراتك وتواجه التحدي ده. فا انت ببساطة تقدر تتخيل نفسك في الوظيفة دي لأنك هتتقبل فيها.

2 – لو سألك اذا كنت مهتم بالوظيفة والشركة
خلال الانترفيو لو الانترفيور وقف في الكلام وسألك عن رأيك في فرصة العمل دي فاهو ببساطة بيقيس مدي اهتمامك بالوظيفة والي يعتبر علامة كويسة. ممكن يسألك مثلا ايه رأيك في الوظيفة, ولو مهتم بيها ازاي تقدر تربط خبراتك المهنية بالوظيفة دي وازاي هتساعد الشركة بشغلك وخبرتك. متنساش طبعاً تفكره بخبراتك وتجاربك السابقة وتشرحله اقرب امثلة لوصف الوظيفة المطلوبة.

3 – هيسألك انت بتشتغل ولا بتدور علي شغل.
عادةً لو الانترفيور سألك هل بتشتغل حالياً ولا لا. و لو مش بتشتغل هل بتدور او قربت تمضي مع شركة تانية فا هو في الغالب عاوز يعرف انت هتبقي مهتم لو عينك ولا لا. لان معظم الناس بتعمل انترفيوهات ولما يجي يتعين مش بيروح الشغل او بيرفض الفرصة. فا الانترفيور بيبقي عاوز يعرف مدي اهتمامك للشغل لو تم قبولك.

4 – هيرغي معاك : D
مش بهزار لكن لو لقيته خلص الاسئلة الخاصة بالمقابلة وبدأ يتكلم معاك في مواضيع عامة او شخصية فا هو تقريباً اقتنع بيك كمرشح محتمل للوظيفة وعاوز يتعرف عليك اكتر وعلي شخصيتك وبالفعل هيديك الوظيفة وهيحب يتعامل معاك في الشركة. لانه لو مش معتقد انك هتكون مناسب للشركة ماكنش هيضيع وقت الشغل المهم في كلام فاضي.

5 – بيستخدم اسمك كتير
لو الانترفيور بدأ ميكلمكش غير بأسمك فا ده مؤشر علي اقتناعه بيك ودليل علي انه بدأ يتخيلك بتنضم للشركة وبتكون موظف فيها.

6 – هيبدأ يعرفك علي المديرين
لو بدأ يعرفك علي ناس اعلي منه في الشركة ماكنتش متوقع تقابلهم في اول مرة زي مدير اعلي منه او مسؤول كبير في الشركة فا ده مؤشر كبير انك خلاص اتقبلت في الشركة لانه مش هيضيع وقته ووقت الناس الاكبر مع واحد مش هيعينه.

7 – الانترفيو بيقعد مدة اطول من المتوقع
في الاغلب الانترفيوهات لما بتبقي كتير بيتم جدولتها وكل interviewee بيبقي ليه ميعاد معين ومدة معينة, لو حسيت ان الانترفيو طول و”الكلام جاب بعضه” واتكلمتوا عن حاجات كتير تخص الشركة ومستقبلك وخبراتك وتجاربك السابقة وشغلك الي قبل كدا ده معناه انهم مهتمين بتعيينك وفضلوا الانترفيو والكلام معاك علي مشغولياتهم التانية في الشركة.

8 – لو رتبتوا لمقابلة تانية
معظم الشركات الكبيرة بتكون ملتزمة بجدول معين لتعيين الموظفين الجدد كل فترة, لو الانترفيور في اخر الانترفيو حدد معاك ميعاد لمكالمة تانية او مقابلة تانية فا ده برده مؤشر كويس انهم مهتمين بتعيينك.

9 – لو ادالك فرصة تكلمه بعد الانترفيو
ان حد يديلك الكارت الشخصي الخاص بيه دي بتعتبر واحدة مهمة من اتيكيت البيزنيس, في نهاية الانترفيو لو الانترفيور ادالك الكارت الخاص بيه وطلب منك تكلمه لو عندك استفسار او سؤال مهم او تواصل معاك من خلال الايميل يبقي ده دليل عظيم انه مهتم بتعيينك.

في النهاية حابب اضيف انك لازم قبل اي انترفيو تكون ” مذاكر ” الشركة كويس وعارف كل متطلباتهم من الموظف الي محتاجينه وتكون قاري وصف ومهام الوظيفة كويس جداً. وفي النهاية حتي لو متقبلتش في اي انترفيو فا ده بيكون خبرة ليك انك تعرف ازاي تتعامل مع الـ HR وازاي تكون افضل في الانترفيوهات الجاية.

لا ننسي الشكر لأستاذ M Ohamed Ashour علي إعداد الفيديو المميز

الكلمات الدلالية: interview